SARRIA. Unha ducia de empresas concorren ao concurso convocado polo Concello de Sarria para executar as obras de ampliación do cemiterio municipal, ás cales se destina un orzamento de 371.867 euros.
O concelleiro responsable da necrópole, Efrén Castro, sinalou que o procedemento tivo «unha boa acollida» entre as empresas, ao tratarse dunha actuación «cunha contía importante». Segundo avanzou, a mesa de contratación reunirase a próxima semana, de modo que os traballos poderán estar adxudicados nun breve prazo.
As obras suporán a construción de 264 nichos, que deberán realizarse nun máximo de catro meses, polo que estarán finalizados este mesmo ano.
Trátase dunha ampliación moi demandada entre os veciños, moitos dos cales levan anos esperando para conseguir sepulturas no cemiterio municipal, onde o número de solicitudes rexistradas rolda as 300.
A ampliación da necrópole municipal con gran demanda veciñal, farase nuns terreos de case mil metros cadrados
Segundo recolle o proxecto, con data de febreiro de 2017, o paso do tempo e o aumento da poboación fan necesaria esta ampliación da necrópole, que se fará na mesma parcela na que se sitúa a actual. O solar completo, situado na Corga do Convento, ten unha superficie de 4.725 metros cadrados, dos cales a maior parte (3.735) están ocupados polo antigo cemiterio e as sucesivas ampliacións. Os 990 metros cadrados restantes -no extremo sur da parcela- utilizaranse para levantar outros 756 nichos e 126 columbarios, cun custo de 756.500 euros, distribuídos en tres rúas que se situarán a diferentes alturas para salvar o desnivel existente no terreo.
As obras que saíron a contratación supoñen a primeira fase destes traballos e levan a metade do orzamento. Consistirán na cimentación de toda a superficie e a construción dunha das tres rúas, o que permitirá habilitar 264 novas sepulturas. A segunda fase terá un custo de 200.000 euros e a terceira, de 184.000.
A última ampliación do cemiterio municipal de Sarria executouse con cargo ao plan E do ano 2009, o cal dotou ao camposanto doutros 108 nichos, ademais dun edificio de servizos funerarios.
