O grupo municipal do PP de Sarria denunciou falta de limpeza por parte do Concello en parroquias como Ferreiros ou Calvor, onde a presenza de maleza nas vías e espazos públicos xera queixas entre os veciños.
Os populares fan alusión a estas dúas parroquias porque recentemente celebraron as súas festas patronais (nun caso a Ascensión e no outro, o Corpus), datas estas que tradicionalmente viñan sendo elixidas polo Concello para proceder ás tarefas de roza nestas zonas.
O PP recorda que nestes momentos, por causa da crise sanitaria do coronavirus, están suspendidos os festexos parroquiais, o que non impide que se organicen comidas familiares e se espere unha correcta limpeza pública.
Segundo di, nalgúns casos foron os propios veciños quen se encargaron de rozar polo estado que presentaba a parroquia. "É unha mostra de desidia e abandono da zona rural", opina este partido, que asegura que tamén houbo danos en coches polo mal estado das pistas.
"En lugar de rozar nas parroquias coma todos os anos o goberno de Camiña Sarria está máis ocupado en facer contratos millonarios para a privatización de servizos ou comprar inmobles", afirman os populares.
