O PP de Sarria presentou este xoves a petición do pleno extraordinario para reclamar medidas de seguridade ante a onda de roubos, como que o municipio dispoña do servizo de Policía Local e Garda Civil as 24 horas do día.
O partido xa anunciara nunha reunión convocada por empresarios a súa intención de presentar unha solicitude de pleno extraordinario. Na petición, rexistrada o xoves, insta o alcalde a que "no prazo dun mes" haxa patrullas da Policía Local todos os días do ano e as 24 horas, pois non dispón de quenda de noite desde 2017. Desde entón, denunciou, "incrementáronse especialmente os roubos con forza nos locais comerciais".
Propón que se convoquen as prazas vacantes da Policía Local, así como que se inicie e tramite o expediente para a creación doutras de acordo con informe emitido por este corpo e en base ás súas necesidades. Os populares expoñen que o Concello contrate e renove, "a condición de que sexa posible", os auxiliares da Policía Local.
O PP insta a estudar a posibilidade de instalar cámaras, convocar vacantes de Policía Local ou contratar e renovar aos auxiliares
Na moción tamén piden que se inicie o expediente e tramite a solicitude para a instalación de cámaras de videovigilancia ou de tráfico na vila pola "intimidación que poida provocar a quen pretenda perpetrar un acto delituoso e a posibilidade de identificación dos propios delincuentes como dos vehículos que poidan usar nos actos de tal natureza". Tamén reclaman que o Concello inste e requira "formalmente" á subdelegada e o delegado do Goberno para que dótese ao cuartel da Garda Civil dos reforzos co fin de que haxa "durante as 24 horas do día dúas patrullas".
Na súa moción solicitan que o alcalde leve a pleno as modificacións orzamentarias precisas para poder levar a cabo todas estas medidas. Instan, ademais, a que o secretario emita informe sobre, entre outros asuntos, a posibilidade de instalar cámaras, de convocar vacantes de Policía Local ou de contratar e renovar aos auxiliares. Para rematar, piden que a Policía Local presente informe sobre o número de axentes precisos para ter servizo as 24 horas, se se pode implantar xa, as necesidades de medios materiais para levar a cabo a súa función e os lugares que consideran oportunos para instalar cámaras de videovigilancia ou tráfico.
O PP reclama ao rexedor que convoque "de forma inmediata" o pleno extraordinario para tratar estes asuntos e "non se faga como co da Casa das Arsenias", que tivo que facelo o secretario, di.
