O PP de Sarria pedirá no próximo pleno, a través dunha moción rexistrada este martes no Concello, un informe xurídico do secretario municipal para aclarar se se pode empregar a herdanza de José Sánchez Arias nas obras de Ponte Ribeira.
O partido teme que o uso do diñeiro do piso de Madrid doado por este veciño poida carrexar "responsabilidades patrimoniais de máis dun millón de euros" e considera "imprescindible" presentar este informe que achegue "seguridade xurídica" ante "a litixiosidade que se aveciña".
Esta petición realízase despois de que un familiar do falecido presentase un escrito no Concello advertindo que o diñeiro do piso debe ser empregado unicamente para fins benéficos ou culturais, como establecía o testamento. Nese mesmo escrito cuestionaba o uso da escola taller como "floco ilegal", xa que tampouco cumpre cos fins fixados polo doante.
O PP, ademais, cuestiona se a obra da ponte é competencia estritamente municipal ou estatal e, nese caso, se a Confederación Hidrográfica Miño-Sil (CHMS) debería facerse cargo da construción. Pide que se explique se o proxecto está adaptado á lexislación sectorial vixente ou "require algunha modificación".
O partido rexistrou ao mesmo tempo outras dúas mocións para o pleno do día 27. Por unha banda, os populares propoñen a censura da alcaldesa, Pilar López, pola xestión da nave en Rúa Formigueiros, que "vai custar aos sarriaos por riba de 40.000 euros". Isto expono tras coñecerse que o Concello debe indemnizar ao propietario do espazo co pago de dous anos de aluguer. Ao mesmo tempo piden que o diñeiro non proceda das arcas públicas, senón que sexa a propia alcaldesa como "responsable máxima da decisión da resolución do contrato e da xestión do mesmo" quen se faga cargo do pago.
Tamén piden explicacións polo "incumprimento" dos prazos do Plan Marco de Mellora de Infraestruturas Rurais 2017 que en Sarria se traduciu na rehabilitación e arranxo de cinco pistas. En total, contábase cun orzamento de máis de 85.500 euros que debían ser xustificados e executados antes do día 1. Aseguran que as melloras finalizaron o 13 de setembro e, polo tanto, non se cumpriron os prazos da Xunta. Por iso piden a reprobación do concelleiro de Medio Rural, Efrén Castro, e de toda a xunta de goberno local porque "durante un ano non fixeron nada".
