A polémica polo estado da Rúa Diego Pazos de Sarria chegou ao Parlamento de Galicia, onde o PSOE e o PP atribuíron á Xunta e ao Concello, respectivamente, a responsabilidade de arranxar a céntrica vía. O deputado popular José Manuel Balseiro dixo que o ente autonómico estaría disposto a autorizar ao Concello unha reparación "puntual e urxente" da rúa, pero "sen renunciar a súa actuación completa e integral como estaba previsto inicialmente".
A situación da vía foi abordada no Parlamento por mor dunha proposición non de lei do PSOE para demandar á Xunta que "asuma a súa responsabilidade" e arranxe Diego Pazos, de titularidade autonómica, ou permita ao Concello facelo. Esta proposición foi rexeitada cos votos en contra do PP e a favor de socialistas e BNG.
Patricia Otero, do PSOE, denunciou que a Xunta "non exerce as súas competencias" nin deixa ao Concello arranxar o firme da vía, que está nun estado "lamentable" e prodúcense "danos a usuarios e vehículos". Asegurou que é responsabilidade da Administración autonómica ter as súas vías en condicións "óptimas".
Acusouna de deixadez "de funcións" e "tratar de botar balóns fóra" logo da presentación dunha emenda por parte do PP para que se requira ao Concello a execución do proxecto de mellora da vía.
O popular José Manuel Balseiro defendeu que a "desastrosa" situación que presenta a rúa é consecuencia da "deficiente" realización dunha obra promovida e executada polo Concello. Criticou que o PSOE pretenda que "o Concello se lave as mans e que sexa a Xunta a que amañe ou que eles teñen a obriga de corrixir" e a solución é, dixo, reparar a vía segundo o proxecto presentado no seu día. O deputado avanzou tamén que rexistrarán unha proposición non de lei no Parlamento para requirir ao Concello a execución de devandito proxecto.
