A Policía Local de Sarria pillou in fraganti a tres mozos que estaban a desvalixar un establecemento hostaleiro da vila, O Meigallo, nas instalacións do local social do colectivo cultural Meigas e Trasgos.
Os ladróns fixéronse con varias botellas de bebidas alcohólicas, un altofalante, un proxector e outros aveños, como abridores e caixas de velas, aínda que terminaron deixándoos abandonados ao ser sorprendidos polos axentes. Un dos mozos foi atrapado pola Policía Local, mentres que os outros dous lograron fuxir e están a ser buscados.
Os feitos ocorreron sobre as 00.30 horas, na noite do sábado ao domingo. Os mozos accederon ao Meigallo saltando o valo do local, de considerable altura, tras o que abriron unha fiestra e esnaquizaron a alarma.
Un veciño da zona do Chanto deu aviso aos axentes ao ver ás tres persoas saltando o peche, polo que acudiron rapidamente e sorprenderon a dous dos mozos. Ao decatarse da presenza dos efectivos, emprenderon a fuxida cara ao parque infantil e a Policía Local iniciou unha persecución no seu vehículo.
FUXIDA. Finalmente escaparon correndo polo camiño xunto ao río, en dirección ao centro. Na súa fuxida perderon unha bolsa con botellas de bebidas alcohólicas e un monopatín, entre outros aveños. Ademais, xunto ao valo do peche de O Meigallo, nas inmediacións da porta, deixaron abandonados un altofalante, un proxector, máis botellas de bebidas, diñeiro e outros bens subtraídos do local.
O mesmo veciño que deu a voz de alarma volveu avisar aos axentes de que estaba a ver ao terceiro ladrón escapando do establecemento e que se atopaba fuxindo cara Rúa Castelao, situada nas inmediacións. Para evitar que conseguise escapar, a Policía Local foi por un camiño pola marxe do río sorprendeuno cerca da ponte de Castelao, atrapándoo. Este mozo ten domicilio en Lugo.
Na operación tamén interveu a Garda Civil, que está a buscar aos outros dous implicados nos feitos.
O concelleiro de seguridade cidadá, Félix Seijas, agradeceu a colaboración cidadá, que foi fundamental para pillar in fraganti aos delincuentes, así como a intervención dos axentes.
