A Policía Local de Sarria abriu unha investigación para descubrir ao presunto autor do disparo de balín que causou o falecemento dunha gata de cor negra atopada malferida o venres na zona verde de Outarela, no centro urbano da localidade.
Un particular avisou aos axentes, sobre as 14.25 horas do día 17, ao decatarse da presenza do animal, que deambulaba con feridas por Outarela, nun punto da vila con bastante tránsito.
Ata o lugar acudiu unha patrulla da Policía Local e a concelleira Geni Valcárcel, quen ordenou o traslado do felino a unha clínica veterinaria para ser atendido.
Foi alí onde lle fixeron radiografías que permitiron comprobar que as súas lesións non se debían a un atropelo ou outra causa accidental senón á presenza dun balín que lle atravesou a columna e que deixou unha esquirla nun costado.
Os veterinarios intentaron estabilizar e sedar á gata para intervila e retirarlle o proxectil, pero nada se puido facer por salvala e acabou falecendo.
A Policía investiga os feitos, que serían constitutivos dun delito de malos tratos animais, penado con prisión. Para iso comproba o rexistro de armas de aire comprimido e realiza indagacións pola zona na que apareceu a gata, de propietario descoñecido.
Colaboración cidadá
Valcárcel fixo tamén un chamamento á responsabilidade para cos animais e a colaboración cidadá. Neste sentido, pediu que se alguén ten algún dato sobre o sucedido póñase en contacto coas autoridades.
