A Policía Local de Sarria, tras un período de información e advertencia aos cidadáns, comezou a realizar as primeiras denuncias por incumprir o confinamento nos fogares.
Este luns cursou tres, unha delas a unha persoa de idade avanzada que paseaba polo bulevar da Rúa Calvo Sotelo sen motivo xustificado e que hai uns días xa fora avisada de que esta conduta non está permitida.
As outras dúas denuncias foron a unha parella que circulaba nun mesmo vehículo e que, tras facer a compra, foi conxuntamente a un estanco.
Na mañá deste martes, houbo tamén controis de turismos por parte da Policía Local e expedientes a persoas que paseaban pola vila.
As denuncias serán derivadas á Subdelegación do Goberno para que adopte as sancións que proceda.
O concelleiro de seguridade, Félix Seijas, recordou a necesidade de cumprir as normas derivadas desta situación de crise sanitaria e asegurou que a Policía Local levará esta misión "a machada".