lunes. 19.10.2020 |
El tiempo
lunes. 19.10.2020
El tiempo

O polémico empresario sarrián Javier Álvarez, 'O Alemán', morre en Colombia

Javier Álvarez López, no xulgado. EP
Javier Álvarez López, no xulgado. EP
Condenado por estafas na venda de coches, prostitución ou falsidade de documentos. Un familiar repatriaría as cinzas do home, quen padecía unha enfermidade e apúntase a que puido morrer con covid

O sarrián Javier Álvarez López, máis coñecido como 'O Alemán' e polas súas múltiples causas nos xulgados, faleceu en Colombia aos 68 anos de idade. Algunhas fontes sinalan que as cinzas do controvertido empresario xa foron repatriadas, aínda que outras apuntan que aínda está pendente de facerse.

Ao parecer, sufría unha enfermidade desde hai un tempo e incluso se apunta a que puido falecer con coronavirus. O seu fillo maior sería o que se faría cargo das cinzas e da súa repatriación.

Javier Álvarez, 'O Alemán'Javier Álvarez tiña aínda varias causas pendentes coa xustiza. O sarrián é un coñecido empresario que estivo vinculado a estafas na venda de vehículos ou prostitución, que o levaron en múltiples ocasións ante os tribunais. A última foi este mesmo mes de xullo por presunta estafa na venda en 2014 dun turismo, aínda que non se chegou a presentar no xulgado do Penal número 1 de Lugo ao non notificarlle a citación de comparencia porque non puideron localizalo.

O currículo delituoso de 'O Alemán' remóntase xa a fai máis de tres décadas. Nacido na parroquia sarriá de Lousadela no ano 1952, comezou con negocios de venda de vehículos ao seu regreso da inmigración no país xermano, de onde lle vén o seu alcume. O empresario importaba automóbiles do estranxeiro, co que tivo numerosos problemas coa xustiza.

Un dos últimos casos no que estivo implicado estalou en 2017, cando foi detido xunto a outras persoas pola venda de vehículos supostamente trucados e pasou un tempo na prisión.

O Tribunal Supremo envío hai uns meses á Audiencia Nacional o caso por haber polo menos cen afectados procedentes de toda España. Os automóbiles presuntamente tiñan alterado o cuentakilómetros ou presentaban avarías. Os vehículos venderíanse nun establecemento que o sarrián tiña na estrada de Lugo a Sarria, á altura de Monforte, cos logos de Mercedes.

Javier Álvarez tamén é coñecido nos xulgados por casos de prostitución e tivo varias barras americanas en Sarria e Lugo. Unha delas, Os Mariachis, situábase en Betote e foi, ao parecer, a primeira na que actuou Francisca Soto, 'Pandora', a raíña da noite lucense neses momentos. Entre outros casos, foi condenado en 2004 a 12 anos de prisión por obrigar a catro colombianas a exercer a prostitución noutro local que tivo en Sarria, Apocalipse.

O sarrián tamén estivo implicado nestas décadas en casos por falsificación de permisos de conducir, falsidade ou estafa a entidades financeiras, entre outros. Hai seis anos foi imputado pola súa presunta participación nunha trama de estafas a compañías de seguros, coa que supostamente causaban danos en vehículos e falsificaban a documentación.

FOXE NOS AÑOS 90. As diversas causas que tiña levaron incluso a que nos anos 90 protagonizase unha fuga, que acabou coa súa detención por parte da Interpol na cidade alemá de Hamburgo a tenor dunha orde cursada pola Audiencia Provincial por xuízos pendentes e sentenzas por cumprir.

Esta sonora fuxida acabou en 1996 co sarrián extraditado e no cárcere de Bonxe. Incluso antes desta fuga anunciou a súa propia morte, simulando ser un informante anónimo.

Uns anos despois, en 2001, o sarrián deu unha rolda de prensa para denunciar presuntas irregularidades dun cabo da Garda Civil e a xustiza condenouno por calumnas. Ese axente acabaría un tempo máis tarde sendo detido na operación Carioca.

O polémico empresario sarrián Javier Álvarez, 'O Alemán', morre en...