As pistas de tenis do Concello de Sarria sometéronse nos últimos días a labores de limpeza e mantemento co fin de eliminar o verdín e proximamente terán nova iluminación, segundo informou o concelleiro de deportes, Félix Seijas.
As tarefas de limpeza, realizadas por persoal municipal, comezaron o xoves da pasada semana e obrigaron a pechar estas instalacións, que xa volven estar operativas.
A intención é dotar as pistas dunha nova iluminación que se atopa en fase de estudo e que permitirá o seu uso durante máis horas.
O concelleiro confía en que o cambio de luz poida ser unha realidade durante o próximo mes de febreiro, o que, na súa opinión, axudará a potenciar a práctica de deporte ao aire libre, cada vez máis importante por causa do covid.