A alcaldesa en funcións de Sarria, Pilar López Yáñez, do PSOE, remitiu un escrito o pasado luns á xunta electoral da zona no que pon de manifesto supostas irregularidades na composición de polo menos tres mesas electorais do municipio nos comicios do 26 de maio.
Segundo a súa versión, nos colexios da Veiga, Callás e casa da cultura B formaron parte das mesas persoas que non figuran na acta do pleno do día 29 de abril no que se sortearon os nomes dos presidentes e vocais. A rexedora sostén que este feito incumpriría a lei orgánica do réxime electoral xeral e podería ser constitutivo de delito.
A xunta electoral de zona deu traslado ao Concello de Sarria do escrito presentado por Pilar López, para que formule as alegacións que considere oportunas no prazo de 48 horas.
Desde o Concello están a elaborar un informe para remitir á xunta no que descartan irregularidades na composición das mesas e explican que, debido a un "erro informático", en lugar de utilizar o segundo listado de suplentes que figura na acta do pleno empregouse unha terceira listaxe, do que se obtiveron dous nomes para as mesas como substitutos dos titulares.
En todo caso, engadiron, saíron elixidos tamén mediante un sistema aleatorio e foron notificados aos interesados seguindo o procedemento electoral.
Tamén mostraron a súa sorpresa polo feito de que esta reclamación se produza máis dunha semana despois da celebración das eleccións e non no momento de conformar as mesas.
Os comicios do 26 de maio reportáronlle seis edís á agrupación de electores Camiña Sarria, outros tantos a PP, dous a PSOE, dous a BNG e un a Galicia Sempre.
