Os barrios da Estación e O Mazadoiro de Sarria estarán unidos por unha pasarela peonil metálica sobre as vías do tren de 22,5 metros de lonxitude. Esta actuación, unha vella demanda da vila sarriá, inclúese no proxecto de tratamento de plataformas e cruces en catro estacións do tramo Monforte de Lemos-Lugo, licitada hai uns días polo Administrador de Infraestruturas Ferroviarias (Adif).
O paso peonil dará acceso a unha nova plataforma lateral, así como ao Mazadoiro. "Contribuirá a mellorar a permeabilidade urbana", conectando Sarria e este barrio "de forma accesible e segura", destacaron desde Adif. A infraestrutura construirase nas proximidades do edificio de viaxeiros da estación de tren, no seu lado nordeste, "localización óptima para dar servizo tanto ao uso ferroviario como urbano", indicaron.
A pasarela executarase en estrutura metálica e descansará sobre uns muros de formigón. Estará dotada con ramplas e escaleira fixa, así como con iluminación de tipo led. Os traballos tamén contemplarán a construción de accesos ao paso peonil desde a vía pública e a demolición do muro e valado existente, necesario para a construción da nova estrutura.
Por agora descoñécense os prazos de execución da pasarela, segundo sinalaron desde Adif, á espera da adxudicación do proxecto de tratamento de plataformas e cruces de catro estacións, o cal saíu a licitación por un importe de 4,4 millóns de euros. O contrato ten aberto ata o próximo mes de abril o prazo de recepción de ofertas.
ALTERNATIVAS. Para a construción da pasarela elaborouse previamente un estudo de alternativas, onde se realizou unha análise de posibles solucións e localizacións de paso a distinto nivel, tanto inferior como superior.
Tras valorar as vantaxes e inconvenientes das propostas (paso inferior único, elevado único con varias opcións de localización, pasos independentes para fluxo peonil e ferroviario) e sometelas a consideración do Concello, optouse pola pasarela elevada peonil de uso mixto, é dicir, tanto para os usuarios da estación como para os veciños.
Concello e Senado. A construción da pasarela foi abordada no pasado tanto no pleno do Concello como no Senado. En varias ocasións houbo anuncios de que se executaría, aínda que non se chegou a materializar. O asunto será tratado agora no Congreso, despois de que o PSOE anunciase que preguntará polo calendario de execución desta esperada obra.
