O Tribunal Supremo (TS) enviou á Audiencia Nacional o caso por presunta estafa na venda de vehículos polo que en outubro de 2017 foi detido en Sarria, entre outras persoas, Javier Álvarez López, máis coñecido como O Alemán. A causa pasa ao órgano xudicial madrileño por, alegou, haber ata o momento cen afectados procedentes de toda España.
O xulgado de primeira instancia e instrución de Sarria inhibiuse en decembro de 2018 e enviou o caso ao xulgado Central número 6 da Audiencia Nacional, que o rexeitou alegando que a estafa investigada non produce grave repercusión no tráfico mercantil nin na economía nacional ou un prexuízo patrimonial a unha xeneralidade de persoas.
Expúxose entón unha cuestión de competencia negativa, tras o que o Supremo considera, segundo recolle nun auto do pasado mes de decembro, que lle corresponde ao tribunal con sede en Madrid a instrución desta causa. O Supremo argumenta que se trata de defraudacións de especial "entidade", con ata o momento "cen prexudicados" repartidos por todo o territorio, con importantes "prexuízos económicos" e xerándose "grave repercusión no tráfico mercantil" mediante a posta en circulación de numerosos "vehículos importados de Alemaña" con manipulacións na súa quilometraxe e importantes avarías", apunta na resolución.
Ademais, indica o Supremo, a finalidade da norma competencial é, como apunta o Ministerio Fiscal, encomendar os asuntos de maior transcendencia económica e complexidade de instrución aos órganos especializados, centralizados e materialmente máis dotados da Audiencia Nacional e, polo tanto, en mellores condicións para realizar en menor tempo e sen dilacións unha instrución máis completa e eficaz.
O Tribunal Supremo finaliza o seu auto destacando "a importancia do esforzo" realizado ata agora por parte do xulgado de Sarria para "apurar unha instrución que desborda as súas posibilidades e competencias".
Entrega de diñeiro. Os automóbiles foron adquiridos por residentes en diversos puntos de España, os cales ingresarían "importantes sumas de diñeiro" ás contas que lles facilitarían os vendedores. Obterían o vehículo "coa quilometraxe alterada", "con importantes avarías" ou ben non recibirían o coche, recolle o auto.
En ocasións non terían nunca a documentación ou lles entregarían unha provisional ou duplicada, indica. Por iso, os feitos son cualificados de estafa agravada, contra a propiedade industrial, falsidade documental, pertenza a organización criminal e frustración da execución.