O parque eólico Montes de Abella, que se sitúa en terreos de Láncara e Triacastela, ten xa en marcha a montaxe dos aeroxeradores, cuxa potencia total será de 15 megawatts.
Trátase de cinco muíños, dos cales a empresa completou a instalación dun dos dous que corresponden ao municipio de Triacastela. Os tres restantes situaranse en parcelas de Láncara.
A construción deste parque está promovida por Inverólica de Abella, empresa con sede en Chantada, segundo a cal estes cinco aeroxeradores serán os máis grandes instalados ata o momento en Galicia en canto a potencia e tamaño, dado que teñen un diámetro de rotor que alcanza os 132 metros.
A pesar de que a meteoroloxía dos últimos días retardou un pouco os traballos, os promotores do parque eólico confían en concluír a instalación entre finais deste ano ou comezos do próximo, para empezar a producir xa.
A empresa estima que esta produción de enerxía aproximarase a 56.000 megawatts hora ao ano. Segundo sinala, o proxecto ten un custo total duns "16 millóns de euros", orzamento no que se inclúe tamén a construción dunha subestación e as obras da liña de alta tensión para evacuar a enerxía.
Polo que respecta á creación de postos de traballo, son da orde de 50 "durante o período de construción do parque eólico e cinco no de explotación", explican fontes de Inverólica.
A empresa, que inviste uns 16 millóns de euros, espera comezar a producir en breve
O parque Montes de Abella foi autorizado polo Consello da Xunta no mes de decembro do pasado ano, converténdose nun dos primeiros proxectos en recibir luz verde da administración autonómica dentro dunha lista de 18 parques declarados de interese especial, cuxa entrada en funcionamento producirase antes do 1 de xaneiro de 2020.
Ata a data, a comarca de Sarria contaba só cunha instalación deste tipo, situada entre os concellos do Páramo e Sarria, que se atopa en funcionamento desde hai unha década.
De cara ao futuro inmediato, a compañía Endesa prevé tamén un investimento de 60 millóns en dous parques en Paradela. O de maior tamaño, denominado Serra das Penas e promovido por Enel Green Power -a súa división de enerxías renovables-, producirá 42 megawatts con 21 aeroxeradores. O segundo é iniciativa de Paravento, sociedade participada por Endesa e o Concello de Paradela, este último co 10%. Constará de seis aeroxeradores.
Ademais, a empresa Fergo Galicia Vento quere retomar o proxecto doutro parque entre os concellos de Triacastela e Samos.
