O Concello de Paradela sacará a concurso este mes os cinco espazos para emprendedores do viveiro de empresas, que construíu no polígono industrial e cuxas últimas obras están xa rematadas.
Desde a administración municipal están a realizar os últimos trámites de face a convocar o concurso antes de final de xaneiro. Unha vez que se abra o prazo os interesados terán un mes para presentar as solicitudes.
Entre os requisitos que deben cumprir, segundo recolle o regulamento que foi aprobado polo pleno do Concello en 2019, figuran ser empresas que aínda non se constituísen e prevén facelo nun prazo máximo de tres meses desde a resolución de acollemento, aquelas creadas en menos de seis meses desde a data de solicitude e as candidatas deben contar con oun plan de empresa que garanta a permanencia e estabilidade no emprego e desenvolver actividades que se consideren compatibles coas características físicas do viveiro ou co fin ao que está destinado.
Ao redor de cinco empresas xa se puxeron en contacto co Concello para interesarse polas instalacións, segundo indica o alcalde, José Manuel Mato. Por iso, de saír adiante estes proxectos, poderíanse cubrir xa os cinco espazos dispoñibles.
O Concello finalizou as últimas obras para adecuar o inmoble e a súa contorna, as cales tiveron un custo de 280.962 euros. Para elas foilles concedida unha subvención por importe de 240.000 euros da Consellería de Economía, Empresa e Industria e a adminsitración local achegou o resto. Entre as actuacións figurou a urbanización do acceso, estruturas interiores, carpintería, instalacións de fontanería e electricidade, baños e seguridade contra incendios.
ANTECEDENTES. Con estes traballos acabouse un proceso que comezou en 2018 coa adquisición de dúas parcelas no parque empresarial por unha contía de 85.000 euros a Suplusa, organismo dependente da Deputación Provincial de Lugo, xa desaparecido, que promoveu o polígono.
Ese mesmo ano iniciáronse os traballos, aínda que tiveron que ser parados porque, no momento no que o Concello se dispuña a comprar as parcelas a Suplusa, descubriuse que este organismo non tiña en regra a documentación para enajenar os terreos. Isto levou, indicou no seu momento o Concello, a paralizar as obras e á perda dunha axuda da Administración galega.
En 2019 retomáronse os traballos para a construción do inmoble, os cales foron contratados por 467.375 euros e finalizaron en 2020. As obras contaron tamén cunha subvención de 240.000 euros da Consellería de Economía, mentres que a contía restante foi financiada con fondos municipais.
O viveiro de empresas nace co obxectivo de favorecer a creación e consolidación de novas firmas que potencien e diversiquen o tecido empresarial do municipal, xerando riqueza e emprego.
0,40 euros. Tal e como recolle a ordenanza fiscal das instalacións que foi aprobada polo pleno do Concello en novembro de 2019, o prezo mensual será de 0,40 euros o metro cadrado (máis Iva).
