As obras de ampliación do cemiterio municipal de Sarria, adxudicadas o pasado mes de xuño en 226.000 euros, atópanse paradas ao detectarse unha serie de erros no proxecto, cuxa subsanación suporá un incremento no custo desta actuación duns 100.000 euros.
Segundo o concelleiro Efrén Castro, a pesar de que o proxecto foi revisado descubríronse varios fallos, como non contemplar a cuberta dos nichos ou deficiencias na iluminación. Esta situación levou a parar as obras cando estaban executadas nun 70%, calculou.
O Concello terá agora que facer cambios no proxecto para corrixir as deficiencias, de modo que o custo aumentará en preto de 100.000 euros. Segundo o edil, existe partida orzamentaria suficiente para facer fronte a este incremento, dado que as obras saíron a licitación na suma de 371.000 euros e foron adxudicadas cunha baixa de 145.000.
A dúbida está en se é posible facer unha ampliación de contrato, que sería moito máis rápida, ou se haberá que sacar de novo a licitación os traballos, o que atrasaría o proceso. A técnico municipal considera viable a primeira opción e haberá que esperar a dispor do informe de intervención, apuntou Efrén Castro, quen asegurou que non será necesario enviar de novo o proxecto a Patrimonio.
O PP de Sarria expresou este mércores a súa preocupación por esta obra, que supón a construción de 264 nichos nesta primeira fase. "O prazo para facela era de catro meses e xa rematou", afirmaron os populares, quen dixeron que se adxudicou no seu día "cunha baixa temeraria" e dubidaron de que o novo proxecto non requira de permiso previo de Patrimonio. "Deixamos esta obra con orzamento nn 2015 e imos camiño do 2019 e sen rematar", criticou o PP, para quen "o normal neste caso sería liquidar e volver sacar a contratación".
