A panadería Pallares de Sarria foi a vencedora do terceiro concurso de escaparates de Nadal organizado pola Asociación de Comerciantes e Empresarios (Aces) da vila. Os tres deseños elaborados polo centenario negocio sarrián, un deles dedicado ao peche de Ponte Ribeira, foron os máis votados polo público a través as redes sociais, onde recibiron 127 ‘gústame' nos cinco días que durou o certame.
En segunda posición quedou a tenda Trece Táboas e en terceiro lugar a zapatería Cris Abad, gañadora da primeira edición deste concurso, en cuxo segundo ano se impuxo Colorín Colorado.
Pilar García e Javier Fernández, responsables da panadería, recibiron de mans do presidente da Aces, Ricardo Arias, o diploma que os acredita como o establecemento co mellor escaparate este Nadal en Sarria.
O seu mérito é dobre dado que tanto os tres deseños que locen na panadería como a súa elaboración artesanal foron obra deste matrimonio e da súa filla, Antía. Un deles reproduce a gran tamaño o personaxe do Cascanueces; outro recrea un grupo de nenos, ataviados con gorros e bufandas, cantando panxoliñas, e o terceiro e máis comentado fai alusión ao prolongado peche de Ponte Ribeira. Para iso, valéronse de anacos de pan cos que representaron a ponte cortada en dúas, o que imposibilita aos Reis Meigos chegar ata o belén, á vez que a propia panadería ofrécese para a reconstrución do viaduto.
Este ano tomaron parte no concurso da Aces 15 comercios. Ademais do gañador e os finalistas, anotáronse o estanco Gallego, Senayo, Dos Ruedas, Bicarelo, D'Ari, Duet, Santamarta, Peregrinoteca, Moncho Moda, Azafrán, Cactus Rose e calzados Gayoso.