A "maioría" dos nenos retomaron as clases no colexio Frei Luis de Granada de Sarria. No entanto, parte dos pais aínda non están convencidos das actuacións realizadas no centro e reclaman unha reforma "a fondo" para solucionar as deficiencias que presentan tanto as aulas como os ximnasios nos que se imparte educación física.
Despois de que a maioría das familias decidisen non mandar os seus fillos a clases desde o 20 de xaneiro debido ao apontoamento do centro, a Consellería de Educación decidiu habilitar aulas provisionais na Escola Fogar de Sarria para recolocar os alumnos do CEIP. Este luns regresaron a clase 256 nenos, o que non impide que algúns dos pais continúen coas súas reivindicacións ante a Xunta.
Javier Pico, un deles, destacou que "a maioría" dos nenos retomaron a actividade entre o luns e o martes e que as aulas dispostas por Educación "son aceptables, aínda que con tamaños diversos". "Hai aulas que son moi grandes, pero tamén hai aulas que son moi pequeniñas, cun espazo mínimo. Pero temos que aceptalo para que os nosos fillos poidan ir ao colexio", lamentou.
"A maioría" dos nenos retomaron a actividade entre o luns e o martes
Doutra banda, os pais trasladaron a súa preocupación polo estado dos ximnasios que se atopan na zona afectada polas obras, un lugar que "xa en 2011 apareceu con gretas e agora vólvense a reproducir". "Os forxados que están enriba dos ximnasios están con defectos; aínda que a consellería (de Educación) di que son seguros os pais temos serias dúbidas polos forxados".
É por iso que unha porcentaxe elevada de pais solicitaron "que non se impartan clases" neste emprazamento e que as aulas de educación física se trasladen "a outras zonas seguras do edificio".
Neste sentido, lamentou que a Xunta fale ás veces "dunha reparación puntual dos voladizos e doutra banda fala de reforma integral" do centro, para insistir en que "é necesario realizar unha actuación a fondo no centro para ter un colexio seguro".
