Jueves. 20.09.2018 |
El tiempo
Jueves. 20.09.2018
El tiempo

O outlet de verán de Sarria arrinca con rebaixas de ata o 80 por cento

Varios clientes observan a oferta dun dos comercios que participan no outlet. R.C.A.
Varios clientes observan a oferta dun dos comercios que participan no outlet. R.C.A.

 Un total de 27 tendas participan nesta iniciativa da Aces, que goza de boa acollida 

O bo tempo acompañou este venres a comerciantes e compradores na primeira xornada do outlet de verán de Sarria, que continúa este sábado. Unha cita que no seu quinto aniversario comezou con boa acollida de público e descontos de ata o 80%. Foron moitos os veciños que este venres se achegaron ata os 27 negocios que participan nesta edición.

A Asociación de Comerciantes e Empresarios de Sarria (Aces) organiza un ano máis esta cita, que involucra a diferentes establecementos da vila co apoio da Xunta e do Concello.

Os comerciantes están satisfeitos, aínda que son precavidos ante as vendas, porque "este ano a xente distribúese entre as dúas xornadas", comentan.

Moitos sarriáns aproveitaron esta iniciativa para consultar as ofertas. Os máis pequenos son un dos grandes beneficiados desta cita porque "empezan o colexio pronto e crecen moi rápido", explican nunha das tendas.

As tendas dan saída durante dous días a produtos en stock e a excedentes de tempada con grandes descontos
 

Algún veciño, ademais de comprar, reclamaba que citas como esta se fixesen "máis a miúdo, porque sempre atopas algo interesante". Ademais de roupa e calzado tamén se poden adquirir complementos ou enxoval do fogar, entre outros produtos.

As vendas melloran estes días, pero, como recoñecen desde algún dos comercios, "a xente vén ver o que temos e, aínda que non compre, poden ver o material que vendemos". O outlet de verán de Sarria naceu co obxectivo de facilitar aos comercios a venda de produtos en stock e excedentes da tempada estival.

Na iniciativa participan Ara Moda, Barja Shoes, Cactus Rose, Calzados Chabel, Calzados Gayoso, Calzados Veiga, Colorín Colorado, Cris Abad, D"Ari Shoes, Dimar, Duet Moda, Isabel Moda, Kukin Calzado Infantil, A Orquídea, Lareira de Menchu, Os Soños de Uxía, Mercería Lucía, Mercería Sarillo, Moncho Moda, Olver"s Sarria, Pikaros, Santamarta, Senayo, Slow Dream, Trece Táboas, Ultreia e Vilamey Complementos.

Os 27 negocios volverán abrir hoxe as súas portas ata as nove da noite con boa previsión de vendas ao coincidir coa Noite Meiga, destaca a organización.

O outlet de verán de Sarria arrinca con rebaixas de ata o 80 por cento
Comentarios