Os tres partidos da oposición en Sarria (PP, PSOE e BNG) permitiron onte cos seus votos no pleno que o Concello poida dispor dun millón de euros do remanente de tesosería de 2021, pero non así doutros 2,2 millóns que expuña Camiña e Galicia Sempre. A negativa a apoiar a maior contía débese, segundo dixeron, á falta de negociación por parte do goberno, que chegaron a cualificar de "sobrada".
Si posibilitaron -co voto a favor do BNG e a abstención de PP e PSOE- gastos por unha cantidade próxima a un millón de euros e fixérono porque, tal e como explicaron, nesa suma inclúese a estabilización do persoal municipal e a relación de postos de traballo, que consideraron necesaria. Esta partida está dotada con 600.000 euros, que deberán ser incluídos nos orzamentos municipais dos anos sucesivos.
O expediente de crédito por 2,2 millóns, tamén con cargo ao remanente, recibiu os votos en contra dos tres grupos, quen insistiron en que a aritmética do pleno "é a que é" (dez concelleiros na oposición e sete no goberno). "Se non teñen maioría, teñen que tratar de sumala e ou lóxico é sentar a falar", sinalou o nacionalista Efrén Castro quen, no entanto, deixou a porta aberta a unha futura negociación.
O popular Jousei Antonio García tachou de "soberbia" a actitude do goberno, ao que criticou por incluír unha operación de crédito no orzamento e, ao mesmo tempo, tirar do remanente de tesourería, aspecto no cal tamén incidiu a socialista Pilar López.
O alcalde lamentou que non se aprobase esta modificación de crédito porque, segundo dixo, destinaba fondos a obras "moi necesarias" como o abastecemento de auga a varias parroquias. "Están a tirar abaixo unhas propostas serias cunha actitude obstrucionista", afirmou Garrido, quen reiterou que o remanente do pasado ano ascende a 5,2 millóns de euros, de modo que, aprobándose ambos os expedientes de crédito, quedarían nas arcas dous millóns.
O pleno celebrado onte, dun gran contido económico, aprobou tamén o pago de facturas sen crédito pendentes do pasado ano por máis de 237.000 euros.
Ademais, ratificou o decreto de alcaldía polo cal se solicita unha subvención de 1,1 millóns de euros de fondos europeos para ampliar a residencia de maiores con 40 prazas e un centro de día.
Os tres partidos da oposición abstivéronse neste punto. Argumentaron que a tendencia é cada vez cara a residencias máis pequenas e que resulta incoherente pretender ampliala e ao mesmo tempo pedir á Deputación que a inclúe na súa rede provincial.
Un dos asuntos que suscitou maior debate foi a moción do PP instando a que a oficina de información turística volva estar en Vigo de Sarria, nun local cedido polo Concello á Asociación de Amigos do Camiño de Santiago.
PSOE e BNG coincidiron en que era a mellor localización, de modo que a moción foi aprobada. A concelleira do Camiño, Reyes Abella, sostivo que non hai persoal suficiente para manter esta oficina e a da antiga prisión e deixou entrever que a demanda non será atendida. "É unha atribución do goberno. Por moito que digan é competencia miña", replicou, o que provocou críticas, á vez que se xerou unha controversia sobre se a asociación busca ou non aloxamento aos peregrinos.
Para rematar, o plenó aprobou, co voto en contra do goberno, a moción do PP para crear unha comisión de investigación sobre tres contratos menores do Concello, asunto que, segundo este partido, acabará no xulgado.
