A alcaldesa de Sarria, Pilar López, achacou o atraso de oito meses no pago a provedores a que non se licitaron 25 contratos maiores.
Asegurou que o 90 por cento destas facturas teñen reparos de intervención porque debían estar licitados estes contratos. "O PP durante o seu mandato non sacou nin un destes contratos a licitación", afirmou a rexedora. Esta negou que non se realizasen estes pagos a provedores por non ter unha partida, senón que se podería realizar unha modificación orzamentaria. "Estamos vendo como facer para levantar o reparo. Encontrámonos pendentes dun informe xurídico", aclarou.
Segundo a alcaldesa, no anterior mandato xa houbo atrasos nos pagos a provedores de máis "de oito meses". Culpou ao PP de que outras facturas teñan unha demora de dous anos porque votaron en contra dun recoñecemento extraxudicial de crédito. "Hai unhas 200 familias esperando polo pago desas facturas", dixo.
Tamén reiterou que ela non suspendeu pagos en xaneiro de 2017, senón que asegurou que se debeu a un informe de intervención e secretaría e a que o PP votou en contra da creación dunha praza de tesoureiro habilitado.
