Preto de 9.000 quilómetros separan San Francisco, en Estados Unidos, de Sarria, pero isto non impediu que un escultor, José Benavides, participe na exposición de Artistas e Artesáns da Comarca no Camiño. E faino con tres obras que representan outras tantas "etapas de superación persoal", que, para o autor, forman parte da ruta xacobea.
Benavides percorreu o pasado ano o Camiño Francés desde Saint Jean Pied de Port e ao chegar á vila sorprendeulle a mostra que organiza todos os anos a Asociación de Amigos do Camiño na Comarca. Por iso, pediu poder participar na edición deste ano e el mesmo trasladou as obras a pasada semana.
As súas esculturas son unha representación das "tres rutas polas que se pasa, a física, a emocional e a espiritual", conta este artista que naceu en Cataluña, aínda que desde os 7 anos de idade vive en Estados Unidos.
Define a etapa física como aquela pola que os peregrinos pasan entre Saint Jean Pied de Port e Burgos, percorrido no que comezan "a alixeirar as súas cargas, tanto literal como metaforicamente, arroxando o innecesario e facéndose máis fortes". Xa en Castela e León vívese a "ruta emocional", pois ofrece "espazos abertos e soidade". As camiñadas vólvense "meditativas" e este tramo é "moi introspectivo".
Para rematar pásase pola "ruta espiritual", na que os peregrinos chegan á comunidade galega e atópanse cunha paisaxe de bosques "montañosos, prados, arroios e terras de cultivo". O camiñante está "inmerso nun sentido de vitalidade física, claridade de pensamento e plenitude de espírito", define José Benavides, quen estes pasos recolleunos nas súas esculturas, elaboradas ao seu regreso a Estados Unidos.
DONACIÓN. Trátase da primeira vez que un artista de fóra de España participa na exposición, indica o presidente da Asociación de Amigos do Camiño na Comarca, Jorge López. O estadounidense doou as tres obras ao colectivo co condicionante de que se exhiban en mostras da entidade sarriá.
