CONCIENCIAR SOBRE a sensibilización química múltiple (SQM) é a razón que leva a uns peregrinos a percorrer o Camiño de Santiago desde Sarria, aventura que comeza este mércores o andaluz José Fernández e á que se suman en pequenos tramos persoas que sofren esta doenza.
Unha iniciativa bautizada como O Camiño dos sentinelas porque así senten os enfermos, como os canarios que levaban ás minas para servir de sentinelas e alertar da presenza de sustancias químicas.
O proxecto partiu de José Fernández por unha "promesa" que fixo a unha amiga, Juana Muñoz. ela quería peregrinar a Compostela, pero non pode facelo polo seu delicado estado de saúde pola sensibilidade química, que leva a que incluso non pode saír de casa, explica o andaluz. Este quere percorrer o Camiño por ela e por todas as persoas que sofren a dura enfermidade.
Para el tampouco será fácil, pois ten problemas cardíacos. "Non sei se acabarei, estiven a adestrar para facelo", di José Fernández. Destaca que moita xente se sumou a O Camiño sentinela, como de Galicia, Murcia, A Rioxa, Baleares ou Andalucía. Cada día algunhas persoas con sensibilidade química múltiple participarán na peregrinación.
"Hai casos nos que non se poden montar nun coche. Saben que por percorrer un tramo do Camiño poden estar na cama dúas ou tres semanas", explica sobre este transtorno, que afecta principalmente a mulleres. Un "70%" son mulleres, aclara.
FATIGA CRÓNICA. Unha das enfermas que tomará parte é a lucense María José Gómez. "Faremos tramiños porque non somos capaces de máis debido á fatiga crónica que carrexa a sensibilidade química múltiple. Podemos esforzarnos o xustiño", afirma. Ela mesma hai uns días camiñou 15 minutos, tras o que na seguinte xornada estaba "baldada, non muscularmente".
"Queremos facer tramiños e ir á Praza do Obradoiro, pero non podemos prometer nada", di. Isto é porque non é previsible a enfermidade e poden amencer cun día "terrible". Entre os síntomas que sofren está taquicardia, febre pola desregulación da temperatura corporal, xaquecas, cefaleas, fotofobia, artralxia..., conta. Para a enfermidade "non hai cura nin medicamento, só evitación", apunta Gómez, quen reclama o apoio das institucións.
Os pacientes están "contentísimos" de que se leve a cabo esta iniciativa. É "moi importante" que se visibilice a doenza, pero aínda máis que non haxa máis enfermos. Para iso deberíase evitar o uso masivo de pesticidas, conservantes, colorantes, sustancias químicas nos postos de traballo..., opina a lucense. Esta anima a todas as persoas que o desexen a sumarse á peregrinación para dar a coñecer o transtorno e "obrigar á Organización Mundial da Saúde (OMS) a que tome medidas drástricas para que non se siga estendendo e que se mire para outro lado cando somos máis as persoas afectadas".
Na xornada deste mércores a peregrinación discorrerá entre as localidades de Sarria e Portomarín. O seu obxectivo é percorrer uns 20 quilómetros diarios co fin de finalizar o vindeiro martes á Praza do Obradoiro. Neste lugar depositarán unha máscara, un zapato e unha planta, en representación dos enfermos, dos que non puideron peregrinar e desta "doenza ambiental".
