O presidente da Xunta, Alberto Núñez Feijóo, e o alcalde de Láncara, Darío Piñeiro, mantiveron na mañá deste mércores unha reunión na que abordaron diversos asuntos do municipio, como a humanización dos terreos da antiga vía do tren na Pobra de San Xiao.
A este respecto trataron os futuros usos que se poderán dar á vella estación. O presidente valorou como "unha boa opción" a proposta de trasladar o consistorio a este inmoble e darlle un uso social ao vello cargadeiro de mercancías. Tamén fixo fincapé no proxecto de establecer nos terreos do ferrocarril unha zona verde, aparcadoiros, un carril bici e zonas peonís.
Núñez Feijóo comprometeuse a desbloquear o plan especial de infraestruturas e dotacións da antiga vía, o cal xa foi sometido ao período de consultas ambientais e está na fase de solicitar os informes sectoriais, tal e como informou a Administración autonómica.
Segundo o rexedor, a Xunta, ademais, comprometeuse a achegar financiamento para levar a cabo a humanización dos terrrenos do antigo ferrocarril.
Durante o encontro, no que tamén participou a segunda tenente de alcalde, Begoña López, abordaron a ampliación da rede municipal de abastecemento de auga para dar servizo a varias parroquias, como Toirán, Bande, Trasliste ou Vilaleo.
Ademais, trataron o desenvolvemento do acceso ao futuro polígono industrial, a situación do covid no municipio e o apoio prestado pola Xunta para a loita contra esta enfermidade coa entrega de material. A administración destacou que ata este momento catro empresas de Láncara recibiron axudas da liña de liquidez por un importe próximo aos 20.000 euros.
Darío Piñeiro agradeceu "a xentileza e hospitalidade" do presidente da Xunta e a vontade para chegar a acordos "polo ben de Láncara".