O Concello do Incio resultou beneficiario dun novo taller de emprego da Xunta de Galicia, compartido por segundo ano cos concellos veciños de Bóveda e A Pobra do Brollón, o cal terá como labor acondicionar os parques e xardíns públicos deste municipio.
Segundo explicou o alcalde, Héctor Corujo, actuará en lugares como o parque infantil e a zona verde do centro da Cruz do Incio ou as áreas recreativas de Laiosa e outras parroquias. Nalgúns casos, dixo, tamén se instalarán elementos de mobiliario urbano.
Este obradoiro, cunha duración de nove meses, está financiado pola Consellería de Emprego con 346.946 euros e contará cunha vintena de alumnos-traballadores, dos cales seis corresponden ao Incio, sete a Bóveda e outros tantos a Brollón.
No caso do Incio pertencen á especialidade de instalacións e mantemento de xardíns e zonas verdes, na que recibirán formación teórica e práctica a partir deste mes de outubro.
O Concello de Bóveda exerce este ano como promotor do novo taller, para o cal ten aberto o proceso de selección do alumnado a través das oficinas de emprego de Sarria e Monforte de Lemos, así como do resto do persoal, formado por un director, tres monitores a tempo completo e un administrativo a media xornada.
O pasado ano, estes tres concellos uníronse tamén para solicitar un obradoiro, que se clausurou hai só uns días e por medio do cal unha vintena de persoas formáronse en actividades auxiliares de conservación e mellora de montes. O Concello do Incio foi o promotor daquela iniciativa, que permitiu acondicionar, entre outros puntos, a Ruta do Ferro e as sendas que conducen á denominada Casa de Papel e o Foxo dos Lobos.
