O mozo Diego López Caldas tomará posesión este xoves como novo edil do grupo municipal socialista de Paradela no transcurso do pleno convocado para as 13.00 horas. Natural de Vila Reguenga, na parroquia de San Martiño de Castro, e de 26 anos, substitúe no cargo ao veterano Guillermo Castro, cuxa dimisión se coñeceu en marzo.
Tras máis dunha década como concelleira, Castro decidiu pór fin á súa etapa municipal con motivo da súa xubilación e para que "se vaia incorporando xente nova". A seguinte na lista era Laura Armesto, quen renunciou ao posto, deixando paso a Diego López, o cal concorreu por primeira vez ás eleccións en 2015 como número 4 do PSOE de Paradela.
O mozo, formado en mantemento industrial e cunha oposición en cernes, chega "con ilusión" á política municipal co obxectivo de facer "todo o que estea nas nosas mans para intentar mellorar Paradela dentro das nosas posibilidades", tratando de achegar "un empuxón novo" e co desexo de facer crecer ao partido.
A portavoz do grupo municipal socialista, Sonsoles López, destaca do seu novo compañeiro que "vén con ánimos e savia nova".
No pleno tamén se tratarán outros asuntos como un convenio con Portomarín para a creación dunha praza de arquitecto ou unha moción do PP para mellorar vías que comunican co Saviñao.
