O Concello de Navarrete, na Rioxa, recadará este fin de semana fondos para a ONG sarriá Hospitaleros sen Fronteiras e o seu proxecto para axudar a nenos talibés de Senegal.
A administración municipal organiza varias actividades, entre as que figura a inauguración dunha exposición baixo o título Seguindo os seus soños: voces e relatos de mulleres palestinas. O sábado programou un concerto, mentres que o domingo celebrarase unha representación de teatro. Para estas dúas últimas actividades pon á venda entradas por dous euros, fondos que se destinarán ao colectivo sarrián.
Con este "fin de semana solidario" o Concello "retoma así un dos seus compromisos coa cooperación, posto que firmemente cremos que todos podemos sorrir", indican desde a entidade local.
A ONG envía para os menores material escolar, roupa, calzado e medicamentos, entre outros bens
Deste municipio proceden uns voluntarios de Hospitaleros sen Fronteiras e en anos pasados o concello xa recadou fondos para esta ONG con sede en Sarria. A entidade fundouse co obxectivo de prestar axuda aos talibés, nenos que residen daaras (escolas coránicas) e ven obrigados a pedir esmolas na rúa.
Hospitaleros sen Fronteiras envía para estes menores material escolar, roupa, calzado e medicamentos, entre outros bens. Ademais, facilita a nenos unha comida ao día, atención sanitaria ou clases de español. Os voluntarios do colectivo desprázanse habitualmente no principio do ano a Senegal para levar o material, aínda que neste 2021 non puideron trasladalo eles mesmos por mor da pandemia do covid-19.