A onda de roubos que afectou a Sarria nas últimas semanas motivou este mércores a celebración dunha mesa local de seguridade, na cal expuxeron posibles medidas para facer fronte a esta problemática, como o reforzo da vixilancia policial sobre todo de noite e a instalación de cámaras de tráfico en varios puntos.
A mesa de seguridade, convocada polo Concello, contou coa presenza do capitán da compañía de Monforte, o comandante de posto da Garda Civil de Sarria, o oficial da Policía Local, un axente deste último corpo, o alcalde e o edil de seguridade.
Entre outros asuntos, abordaron un posible reforzo en patrullas da Garda Civil e a colocación dun sistema de videovixilancia nas entradas e saídas do centro urbano, así como en puntos estratéxicos como o cruzamento de Catro Camiños e outras interseccións.
"Somos conscientes da preocupación que existe", di o edil de seguridade, quen destaca a "eficacia" na resolución de delitos
Segundo explicou o concelleiro de seguridade, Félix Seijas, a reunión permitiu establecer protocolos de actuación para "coordinar" os labores de control de ambos os corpos, ademais de intercambiar "información" para a resolución dos roubos. Tamén ofreceron asesoramento ao alcalde e ao edil en materia de vixilancia.
Félix Seijas asegurou que o goberno é "consciente da preocupación que existe" entre empresarios e veciños pola sucesión de roubos. No entanto, afirmou que en termos globais produciuse un "descenso do 4,5%" neste tipo de delitos en Sarria con respecto ao pasado ano, á vez que destacou a "eficacia policial" na resolución de casos como o do último atraco nunha tenda de telefonía móbil do bulevar de Calvo Sotelo.
No que respecta á Policía Local, o concelleiro sinalou que a restauración de quendas de noite "é moi díficil" mentres non se recuperan as cinco baixas que existen nestes momentos en persoal, as cales "non se poden cubrir por lei porque non hai bolsa de interinos". Recordou que na actualidade hai catro auxiliares e mostrouse disposto a "axilizar" desde o Concello a convocatoria de prazas para cubrir catro vacantes.
