A onda de roubos rexistrada a finais do pasado ano en Sarria, con máis de 15 subtraccións en distintos tipos de negocios, deixou paso neste 2020 a unha situación de calma en canto a delitos contra o patrimonio, segundo constatou a mesa local de seguridade.
Este órgano, formado por representantes de Concello, Policía Local, Garda Civil e Bombeiros, mantivo este mércores unha reunión no salón de plenos, no transcurso da cal puxo sobre a mesa a práctica inexistencia de denuncias por roubos no último mes e medio, explicou o concelleiro de seguridade, Félix Seijas, que recordou que será en marzo cando se dispoña do balance oficial trimestral.
Un dos últimos asaltos no concello de Sarria foi perpetrado a finais de decembro na cooperativa Cogasar, no polígono de San Xulián da Veiga, á que accederon de madrugada catro persoas para apropiarse de diñeiro tras conseguir evitar a alarma.
No conxunto da comarca, o caso máis rechamante produciuse en xaneiro en Santa María do Monte (Triacastela), onde un gandeiro denunciou o roubo de 7.000 euros que gardaba no forno da cociña de leña da súa vivenda.
A Policía Local, que recuperou as quendas de noite en xaneiro, mantén o servizo 24 horas coa axuda de cinco auxiliares
A mesa local de seguridade contou coa asistencia do concelleiro, o comandante de posto da Garda Civil de Sarria, o sarxento do parque comarcal de bombeiros e dous efectivos da Policía Local.
Este último corpo recuperou no mes de xaneiro os quendas de noite, que foran eliminadas tres anos antes. Desde ese momento, continúa realizando o servizo as 24 horas, cun persoal axudado por cinco auxiliares. Segundo sinalou Seijas, varias das asistencias que tiveron que prestar neste tempo foron a maiores que residen sós e sufriron caídas nas súas casas.
A mesa local de seguridade preparou tamén o dispositivo que velará polo bo desenvolvemento de dous eventos que se celebrarán proximamente e que se prevén multitudinarios. Trátase do desfile de Entroido do próximo domingo, con saída pola tarde desde o barrio da Estación, e a Carreira da Muller, que terá lugar o día 7 de marzo, cun percorrido de cinco quilómetros pola vila.
En ambos os casos, haberá reforzos de patrullas da Policía Local, que actuarán en coordinación con efectivos da Garda Civil, expuxo o concelleiro de seguridade.
Segundo avanzou, o Concello está tamén á espera de recibir os orzamentos de varias empresas para instalar cámaras de tráfico en puntos estratéxicos como os accesos a Sarria ou Catro Camiños.