A deterioración é cada día maior no firme da vella estrada de Nadela a Monforte (LU-546), á altura de A Pobra de San Xiao (Láncara) e Vilafiz (O Páramo), onde os vehículos circulan entre fochancas e parches de asfalto. O mal estado esténdese á entrada de Sarria desde Lugo.
O pavimento sofre danos desde hai anos, aínda que coas choivas do inverno agrávase a problemática. Presenta un peor estado na Pobra e no límite co concello paramés, no núcleo de Vilafiz. En varios puntos existen numerosas fochancas e pegotes de asfalto, mentres que noutros comeza a gretarse o pavimento e a aparecer danos.
Entre os dous municipios tamén empeza a afundirse levemente o firme na marxe do carril dirección Sarria. Ademais, a grava miúda procedente das fochancas concéntrase na beiravía en diversos puntos da LU-546.
Este tramo da estrada sufriu unha importante carga de tráfico de vehículos pesados cando se executaron as obras da variante do tren da Pobra, influíndo na deterioración do viario. O persoal de conservación de estradas rebachea cada certas semanas, aínda que aos poucos días, sobre todo se chove, volven aparecer as fochancas.
A Xunta prevé levar a cabo un reforzo do firme localizado nesta vía, proxecto que foi aprobado e está á espera de licitarse
Os concellos de Láncara e O Páramo non son os únicos afectados os danos, pois tamén se producen na travesía de Sarria. Nada máis entrar na vila desde Lugo, na rúa Matías López, hai varias fochancas, situación que se repite nas inmediacións da intersección coa Rúa Formigueiros. Neste último caso os danos prodúcense en toda a calzada, incluída a zona destinada ao estacionamento.
REPARACIÓN. Desde a delegación territorial da Xunta en Lugo informaron este martes de que a Axencia Galega de Infraestruturas prevé levar a cabo un reforzo do firme localizado na LU-546, aínda que non concretaron os puntos quilométricos nos que se realizará.
Trátase dunha actuación na que tamén contémplanse obras similares noutras catro vías da provincia. O proxecto xa foi aprobado e a Xunta está pendente de licitar os traballos, indicaron desde a delegación territorial. Este órgano espera que salgan a contratación a partir de febreiro.
A Administración autonómica xa realizou hai catro anos un reforzo do firme na LU-546, pero entón afectou unicamente aos termos municipais de Lugo e O Corgo. Naquel proxecto incluíronse obras noutras dúas estradas e tiveron un custo superior aos 400.000 euros.
A LU-546 é a principal vía de comunicación para localidades como A Pobra de San Xiao, pero desde hai unha década sofre unha menor carga de tráfico pola apertura do corredor Nadela-Sarria. O maior número de vehículos circulan entre Nadela e a capitalidade lancaresa (máis de 3.500 de media ao día), mentres que entre Vilapedre e Sarria baixan ata os 2.500, segundo os últimos datos da Administración autonómica, pertencentes ao ano 2018.
