O partido de Albert Rivera, en plena fase de ampliación na comunidade galega, recala esta semana en Sarria coa constitución da agrupación local de Ciudadanos, na que ocupará un posto destacado o exconcelleiro popular Luís Álvarez Rey, quen se implica así nun novo proxecto "cargado de aire fresco".
A formación laranxa mira cara a Sarria como unha importante praza, onde se propón sentar as bases dunha estrutura sólida coas achegas de Álvarez Rey, quen xa exerceu como concelleiro nos mandatos 2003-2007 e 2011-2015, este último período á fronte das delegacións municipais de economía e facenda.
Afiliado ao PP durante anos, Álvarez Rey deuse de baixa o pasado mes de xaneiro tras mostrar o seu desacordo co presidente local do partido, José Antonio García, nunha reunión con cargos electos e simpatizantes de toda a comarca, na que tamén criticou a "falta de peso político" de Sarria.
Agora dá un paso á fronte no proxecto de Ciudadanos, que o vindeiro xoves, ás 20.00 horas, presentará a súa nova agrupación sarriá nun acto aberto ao público no hotel Afonso IX da vila, coa presenza do secretario de organización, Laureano Bermejo, xunto á portavoz autonómica, Olga Louzao. Estes dous representantes do partido ofrecerán hoxe unha rolda de prensa en Sarria para dar a coñecer a agrupación. No acto intervirán, ademais, membros do novo grupo.
O partido presentará o vindeiro xoves, ás 20.00 horas, en Sarria a nova agrupación local nun acto aberto ao público
De momento, trátase de pór en marcha a estrutura do partido a nivel local e con vistas ás eleccións municipais do próximo ano, pero sen falar aínda de candidatos e postos.
Álvarez Rey embárcase nesta iniciativa co obxectivo de que o municipio de Sarria "recupere o tempo perdido". "Hai xente que está moi preocupada pola deriva que está a tomar todo isto. Existe un descontento xeralizado tanto co goberno como coa oposición", sinala o sarrián, para quen os propios veciños "están pedindo na rúa" un cambio.
O exedil ve en Ciudadanos un partido "serio e moi dialogante", características que entende imprescindibles nuns tempos que requiren de moito "consenso" porque "as maiorías absolutas están finiquitadas por uns anos".
Ao seu modo de ver, fan falta políticos que estean "a pé de rúa" e que se preocupen por resolver problemas que arrastra o concello de Sarria como a falta de chan industrial. A situación da residencia de maiores, a polémica xurdida polo floco ou a necesidade de desdobrar o corredor son outros dos aspectos nos que pon o acento.
