Os veciños de Santo Estevo de Lousadela, no municipio de Sarria, levan oito anos esperando pola entrada en servizo da traída de auga. O Concello executou as últimas obras en 2010 e desde entón os residentes agardan a que se finalicen os traballos e se poña en funcionamento o abastecemento.
O Concello construíu no seu momento as canalizacións e un depósito. Este sitúase xunto á estrada de Betote a Santo Estevo de Lousadela e apenas se pode distinguir ao atoparse practicamente cuberto pola maleza. As últimas obras foron contratadas en 2010. Consistiron na captación de auga e adxudicáronse por case 89.000 euros.
Naquel momento a traída non entrou en servizo porque "nun manancial ao que ían buscar auga non había caudal", explicaron desde a comunidade de montes de Santo Estevo de Lousadela.
Propoñen que se aumente a rede de abastecemento municipal ata esta zona para que poidan dispor ao fin da traída. "Pedimos que nos leven a auga para a traída de onde crean conveniente, como de Lezoce. Prometeron facer o abastecemento no Mato e tamén poderían levar a auga desde alí, pois está a uns 200 metros en liña recta do depósito", manifestaron os veciños, e instaron a que o Concello poña xa en funcionamento a traída.
A comunidade de montes mostrou a súa disposición a realizar unha achega na medida das súas posibilidades co fin de que se finalice a traída de Santo Estevo de Lousadela. Os únicos traballos que faltan consisten en levar a auga ao depósito e realizar as acometidas nas vivendas.
Os veciños só dispoñen de pozos particulares, o que provoca que algúns no verán sufran problemas de abastecemento. Por iso foi preciso que en ocasións o Concello levase cisternas de auga ou que algúns residentes fosen a outras localidades da contorna, como Céltigos, para collela en garrafas.
PROXECTO. Pola súa banda, o concelleiro de medio ambiente e feiras, José Manuel López Torre, explicou este martes que o Concello dispón dun proxecto para dotar de abastecemento a Manán e outras localidades, entre as que tamén figura Santo Estevo de Lousadela. Segundo sinalou, están pendentes de levar o documento a un pleno para sometelo a votación.
O proxecto contempla, dixo, levar a auga desde Lezoce ao depósito de Santo Estevo de Lousadela, tras o que podería entrar en servizo o abastecemento.
