O goberno local de Láncara informou de que conseguiu o compromiso de Adif para desafectar integramente as antigas vías do tren que pasan pola capital municipal —A Pobra de San Xiao— e a propia estación da localidade nun prazo de dous "meses", co obxectivo final de comezar a traballar no desenvolvemento dun proxecto para crear unha "senda verde".
O alcalde de Láncara, Darío Piñeiro, acompañado por outros membros do goberno local e pola subdelegada do Goberno en Lugo, Isabel Rodríguez, mantivo este mércores unha reunión de traballo no Concello con técnicos de Adif. Ese encontro, no que tamén participaron técnicos municipais, serviu para avanzar no proxecto de "humanización" dos espazos ferroviarios que quedaron pechados logo da apertura da nova variante da Pobra de San Xiao, no trazado que comunica Lugo con Ourense.
Darío Piñeiro informou de que o goberno local está a elaborar un proxecto sectorial para cambiar o plan xeral do municipio, co obxectivo de darlle un novo uso público ás antigas vías do ferrocarril, nun trazado de máis dun quilómetro, "con zonas verdes" e "novo mobiliario urbano". Piñeiro agradeceu o "interese e a dispoñibilidade de Adif para pór en marcha esta iniciativa, ademais de precisar que ambas as entidades están a valorar a "fórmula" máis adecuada "ás posibilidades" do propio Concello de Láncara para "facer realidade canto antes estes traballos".
