A apertura da segunda Casa Niño do municipio de Láncara está un pouco máis cerca despois de que o Concello, por decreto de alcaldía, autorizase o uso para este fin de parte das instalacións do polifuncional do campo da feira da Pobra.
A cesión realízase por un período de catro anos e cun aluguer mensual de 200 euros que deberá abonar a promotora do proxecto, segundo informa o alcalde, Darío Piñeiro, quen defende que este futuro servizo "nunca perigou por culpa do Concello".
O novo espazo para a conciliación laboral e familiar é unha iniciativa de Gemma Fontenla, a quen a Consellería de Política Social concedeu este mes unha subvención para a posta en marcha dunha Casa Niño co nome As pegadas máis enxebres.
A promotora sinala que as instalacións ocuparán unha superficie duns 50 metros cadrados e terán unha entrada independente. Unha vez confirmada a cesión por parte do Concello coas condicións estipuladas, iniciará de inmediato a reforma deste espazo para poder equipalo e comezar a prestar este servizo ás familias canto antes.
A Casa Niño diríxese a menores de 0 a 3 anos e é gratuíta. Láncara conta con outra similar desde hai un tempo, pero existe demanda suficiente para cubrir prazas en ambas dado que hai 43 nenos nese tramo de idade.