Láncara adxudica a axuda no fogar para tres anos por 970.000 euros

O Concello poderá así prestar as 1.764 horas ao mes que ten asignadas e a empresa contratada ofrecerá aos usuarios servizos de podoloxía, rehabilitación ou barbería

O Concello de Láncara adxudicou o servizo de axuda no fogar á empresa Servital Servizos Sociosanitarios por 977.000 euros por un período de tres anos, prorrogable por outros dous. A firma encargarase deste labor a partir do 5 de novembro.

Ata agora era prestado por persoal do Concello e a través dunha empresa con contrato de servizos, aínda que decidiu externalizalo para poder cubrir todas as horas que ten asignadas. A adxudicataria debe subrogar aos dez traballadores que levaban a cabo este servizo.

A empresa ofrecerá a axuda a domicilio nas modalidades de dependencia e libre concorrencia. Actualmente o Concello ten asignadas 1.764 horas ao mes, das que presta 1.693. Ademais, durante o pasado ano en libre concorrencia prestaba unha media mensual de 160 horas e cos efectivos dos que dispón na actualidade o Concello só pode 32 horas mensuais.

A administración local adxudicou o contrato a Servital Servizos Sociosanitarios por 13,60 euros (máis Ive) a hora ordinaria de dependencia, 11 euros a extraordinaria de dependencia e a de libre concorrencia por 13,60.

Ademais, a empresa ofrecerá varios servizos, que levou a que fora a gañadora do concurso. Entre eles o de podoloxía unha vez ao trimestre para aqueles dependentes que non se poden desprazar fóra do seu domicilio e barbería. Este último tamén será ofrecido unha vez ao trimestre. A firma prestará, ademais, rehabilitación terapéutica para os usuarios que o precisen e así o acrediten mediante informe do seu médico de atención primaria ou especialista. Será complementario e non substituto da de obrigada prestación polo servizo público de saúde.

A adxudicataria dará 14 servizos de lavandería, 25 de transporte adaptado con destino á capitalidade municipal ou a cidade de Lugo e 14 "limpezas de choque" nos domicilios que determinen os servizos sociais do Concello lancarés.

MATERIAL. Servital Servizos Sanitarios prestará material a beneficiarios, como guindastres de mobilización, camas articuladas, cadeiras para a ducha, cadeiras de rodas, muletas ou andadores e cadeiras de rodas para escaleiras.

Para rematar, terá que dar de 31 a 40 horas de formación dos auxiliares adscritos ao servizo e doce horas ao ano de charlas ou talleres de apoio psicosocial para os coidadores ou as familias das persoas usuarias da axuda a domicilio.

Este incremento de servizos non suporá un maior custo para os beneficiarios, senón que se manterá o prezo, segundo o Concello.

O Concello sacou a licitación o servizo o pasado mes de xullo por algo máis dun millón de euros por tres anos. Ao concurso presentáronse sete empresas, tras o que este mesmo mes adxudicou o contrato. Este será asinado o próximo día 2, tras o que o 5 comezará a operar a firma.

Comentarios