O ladrón que asaltou unha tenda de telefonía da rúa Matías López de Sarria o luns a plena luz do día levou varios móbiles e non diñeiro como se informou inicialmente.
O home entrou na tenda apenas uns minutos despois de que a empregada iniciase a xornada de tarde. Acababa de levantar a persiana cando entrou un individuo con máscara e gorra. Pechou a porta tras de si, o que sorprendeu á traballadora e, acto seguido, dirixiuse cara a ela dicíndolle "isto é un atraco" e pedíndolle a recadación.
A moza indicoulle que non había diñeiro e, segundo relatou, o ladrón a colleu por un brazo e levouna ata un armario próximo, onde rompeu a porta para coller varios móbiles, metelos nunha bolsa que portaba e darlle á fuga a pé.
O autor dos feitos díxolle á empregada que non lle ía a facer dano, o que non evitou que esta levase un bo susto. Garda Civil e Policía Local iniciaron a súa procura, sen que transcenda de momento o resultado.
