O municipio de Triacastela ten a honra de ser a orixe da humanidade e da artesanía en Galicia, en palabras do divulgador científico Jorge Mira, encargado de abrir este sábado a novena Feira de Artesanía e Produtos da Zona cun aplaudido pregón.
Este catedrático en Electrofísica recordou a importancia dos achados arqueolóxicos realizados na Cova Eirós de Triacastela, un xacemento que representa para Galicia o mesmo que "Atapuerca para o mundo", afirmou.
"Pódese dicir que a humanidade en Galicia empezou en Triacastela. É máis, vos restos paleolíticos e pinturas rupestres aquí atopados son a primeira mostra da creación humana galega. Co cal en Triacastela non só naceu a humanidade en Galicia, senón que tamén naceu a artesanía en Galicia!", proclamou o pregoeiro, para orgullo dos veciños.
Acompañado da alcaldesa, Olga Igrexas, Jorge Mira aludiu tamén á pegada do Camiño de Santiago no municipio e opinou que "algo ten que haber neste concello para ter este tirón ao longo de tantos milenios, cunha forza que empuxa con tal enerxía que ata rebenta a Terra e vos fai ser epicentro de terremotos".
Tras non poder dar o pregón o pasado ano por atoparse no funeral privado por Stephen Hawking, Mira non quixo perderse nesta edición unha feira que congregou a uns 70 expositores na contorna do consistorio, onde tamén se puideron ver demostracións de talla en madeira, teares e cestería, entre outras.
Organizado polo Concello de Triacastela, a Asociación de Mulleres Rurais Tres Castros e o colectivo de artesás Artelar, este evento, que viña celebrando en Semana Santa, trasladouse por primeira vez ao mes de setembro, coincidindo coa tradicional Feira de Ano do municipio.
E fíxoo cun resultado satisfactorio para os seus promotores e un amplo programa no que houbo como novidade cantos de taberna nos locais de hostalería a cargo dos grupos Foliada de Bosende, Son do Mao, Os Teceláns, Os Terribles de Hortovello e Abrente.
Nunha xornada na que o tempo acompañou achegáronse ata Triacastela a secretaria territorial da Xunta, o alcalde do Incio, numerosos veciños e peregrinos, entre outros asistentes.
A animación musical correu por conta de Piornos do Oribio, o dúo Dolce Vita e a charanga de Vilalba. A programación desta novena edición completouse cunha obra de teatro da compañía Lila no local Fonte do Lunar.
