Uns xabarís causaron na tarde do domingo dous accidentes no corredor que comunica Nadela e Monforte de Lemos, ao seu paso polo municipio sarrián. Os sinistros producíronse sobre as oito da tarde, á altura do quilómetro 31.
Os atropelos aos animais saldáronse sen feridos, só con danos materiais. Ata o lugar dos accidentes desprazáronse axentes do subsector de Tráfico para levantar atestado.
O corredor xa foi escenario anteriormente de atropelos a xabarís a pesar de que se reforzou o valado para evitar que os animais accedan á vía e invadan a calzada.
