O municipio do Incio dá a coñecer o seu patrimonio cunha nova ruta de sendeirismo, que acaba de acondicionar o Concello. Trátase da Ruta do Mamut e dous Castros, un percorrido de seis quilómetros de lonxitude que está homolgado pola Federación Galega de Montañismo.
O itinerario busca dar a coñecer o achado no concello dos únicos restos de mamut de Galicia, que se produciu no ano 1961 na canteira de Buxán. Neste punto finaliza o percorrido, o cal comeza en Lebón.
A administración local encargouse de adecuar a ruta, na que investiu 59.850,62 euros. Nesta contía inclúense dúas réplicas de mamut, instaladas o pasado verán en Reboiro. Para executar estas obras o Concello dispón dunha axuda do Grupo de Desenvolvemento Rural (GDR) Ribeira Sacra-Courel, que xestiona os fondos Leader nesta zona. A subvención foi do 90% do custo dos traballos.
A actuación consistiu na limpeza do percorrido, a sinalización, a instalación de paneis informativos e a homologación da ruta, que ten o número PR-G 239. O Concello tivo que modificar o trazado con respecto ao previsto inicialmente, xa que algúns lugares polos que discorría eran propiedades privadas. Estes cambios levaron a que se atrasase a execución das obras, segundo informou o alcalde, Héctor Corujo.
O Concello ten previsto inaugurar a Ruta do Mamut e dos Castros a principios do próximo ano, cando as condicións meteorolóxicas o permitan. Para a posta de longo do itinerario a administración local está a contactar con asociacións de sendeirismo.
O percorrido comeza en Lebón, onde hai un castro. Posteriormente atópase a necrópole de Santa Mariña, que é Ben de Interese Cultural (BIC) e sitúase no límite dos concellos do Incio, Sarria e Samos. Nesta identificáronse 45 túmulos.
BERMÚN. Nas proximidades da ruta tamén figuran os castros de Goó e Bermún, así como a cova deste último núcleo. A gruta comezou a ser explorada nos 70 e os expertos identificaron varias especies de artrópodos.
Entre os puntos de interese do itinerario están, ademais, o Casarón de Buxán e a Casa de Canteiro. O percorrido finaliza na canteira de Buxán.
