O Incio acollerá o vindeiro domingo a décima Feira de Artesanía e Etnoloxía da localidade, unha cita que este ano virará ao redor das vodas antigas.
A alcaldesa da localidade, Laura Celeiro, e o deputado de deportes, Pablo Rivera Capón, presentaron este mércores no Pazo de San Marcos esta nova edición, que reunirá a 50 artesáns.
O representante provincial recoñeceu a importancia desta feira, que é un "evento lúdico e festivo con gran valor cultural", para o municipio e a comarca. Celeiro recordou que esta cita descobre e dá a coñecer o concello aos visitantes. A xornada comezará ás 11.30 horas coa apertura dos postos de artesanía. Pola tarde, na praza, levará a cabo a representación teatral Vai de vodas, a cargo da asociación cultural Abrente das Nogais e a colaboración de diferentes colectivos do concello e os veciños.
Quen se achegue poderá degustar a rosca de voda e gozar do baile. Os matrimonios de ouro da localidade serán homenaxeados nesta xornada. A cantante Lucía Pérez, natural do Incio, porá o broche final ás 20.00 horas, coa presentación do seu novo disco, Quince soles.
Durante todo o día haberá talleres de instrumentos e confección de traxes. Na caseta do Concello poderase degustar sidra.
