O Concello do Incio homenaxeou á veciña Dominica López Aira, quen acaba de cumprir 100 anos. A muller, do núcleo de Goimil, na parroquia de San Román do Mao, viviu este aniversario tan especial rodeada dos seus familiares.
No transcurso da celebración, a alcaldesa, Laura Celeiro, fíxolle entrega dunha placa conmemorativa co texto "grazas por ser un exemplo de ilusión, forza e traballo". Durante a festa, que tivo lugar no seu fogar, estivo acompañada dos seus tres fillos, sobriños, primos e veciños.
A centenaria, quen goza de boa saúde, mostrouse sorprendida pola celebración do aniversario, na que non faltou a torta para soprar as velas.
A muller reside en Goimil cos seus dous fillos, mentres a súa filla vive no núcleo de Pacios, tamén na parroquia de San Román do Mao.
Dominica López non se perde o Día dos Avós e da Familia do Incio e nas últimas tres edicións recibiu senllos obsequios ao ser a asistente de maior idade á celebración. A inciense asegurou que volverá participar este ano na festa, a cal terá lugar o próximo mes.
A veciña ingresou así no grupo dos centenarios do Incio, ao que tamén se uniu recentemente Ermidas Maceda González. Esta última, quen é natural da parroquia de Santa María de Reboiro, cumpriu 100 anos o pasado novembro e tamén foi homenaxeada polo Concello.
