A histórica sala Litmar de Sarria reabre este sábado cun concerto e tras unha reforma a cargo de Alberto Bouzón e Daniel Gómez, responsables do pub Glass, quen son a nova xerencia.
Litmar levaba pechada como discoteca uns dous anos, tempo durante o cal só acolleu un evento en datas máis recentes. Os artífices da súa reapertura puxéronse ao choio para instalar barras e realizar traballos de iluminación, son e pintura, entre outros, de face ao concerto deste sábado.
Abrirá as súas portas ás 23.30 para, unha hora despois, comezar a actuación do grupo Beatriz, para a cal están á venda as entradas ao prezo de 10 euros con consumición nos locais Tucán, Don Pepe e D"Pont. A entrada en despacho de billetes custará 12 euros.
Alberto Bouzón é, xunto ao seu socio, un bo coñecedor da emblemática discoteca sarriá, onde o seu pai exerceu como encargado e el mesmo foi picadiscos. Segundo explica, este mes teñen tamén programada a actuación de París de Noia para o día 17 e unha festa de fin de ano.
De momento abre só a discoteca, o que non impide que outra persoa poida asumir a parte de restauración.
Litmar naceu en 1967 da man de Lolita Páramo e Omar Vilela. Foi a primeira discoteca de Sarria e alcanzou gran fama, pasando polo seu escenario artistas como Albano, Massiel ou O dúo dinámico.
