A Garda Civil atendeu 102 incidencias nas distintas variantes do Camiño de Santiago en 2018, segundo informou o delegado do Goberno en Galicia, Javier Losada, quen presentou este luns en Sarria o plan de seguridade xacobea para este ano.
A maioría destas incidencias (74) foron referidas a solicitude de información, mentres que os restantes foron "atencións sanitarias de diversa consideración", explicou Javier Losada ante o mosteiro da Magdalena. Diante deste edificio despregáronse efectivos de varias especialidades, como a unidade canina, seguridade cidadá, o escuadrón de cabalería, o Seprona e a agrupación de tráfico. Tamén sobrevoou o convento un helicóptero.
Estas unidades forman parte do plan de seguridade xacobea, no que se integran 1.070 axentes de 72 postos de toda Galicia que se atopan no percorrido das distintas rutas, indicou. Destes postos, 22 atópanse na provincia de Lugo, outros tantos na Coruña, 15 en Ourense e 13 en Pontevedra.
O plan atópase operativo durante todo o ano, pero "redóbrase" en Semana Santa e do 15 de xuño ao 15 de setembro coas unidades aéreas e o escuadrón de cabalería, este último con sede en Sarria.
No plan de seguridade xacobea se integran 1.070 axentes de 72 postos de toda Galicia
Con este operativo perséguese que a ruta xacobea sexa "un Camiño, como é, seguro e atractivo". "A pesar do alto número de visitas, que cada ano se incrementa, podemos destacar a gran seguridade da ruta", manifestou Losada, quen agradeceu o traballo dos axentes que integran o plan.
"Fan que o Camiño goce de prestixio e recoñecemento internacional polo seu valor cultural, a súa riqueza patrimonial e pola seguridade que ofrece", engadiu o delegado, quen estivo acompañado durante a súa visita polo xeneral da XV Zona da Garda Civil, Luis Francisco Rodríguez; o xefe da comandancia de Lugo, Miguel González; a subdelegada do Goberno, Isabel Rodríguez; a alcaldesa, Pilar López, e responsables do cuartel de Sarria.