O supermercado Gadis do bulevar da Rúa Calvo Sotelo de Sarria volveu este xoves a abrir as súas portas tras unhas obras de remodelación e ampliación. O establecemento conta cun total de 40 traballadores, dos que dez se acaban de incorporar con motivo da reapertura.
O negocio duplicou a superficie da sala de vendas, de forma que o establecemento ocupa agora unha superficie total de máis de 1.450 metros cadrados. Segundo informou a compañía, conta, ademais, con un aparcadoiro con 54 prazas para "uso exclusivo" dos clientes, do que non dispuña ata agora. A firma destacou que "o fácil acceso, tanto de forma peonil como en vehículo, é un atractivo importante do supermercado".
O establecemento reabriu logo de varios meses de obras, que supuxeron a demolición dunhas construcións nas rúas Calvo Sotelo e Vázquez Queipo.
Gadis, que abre de forma ininterrompida de 9.00 a 21.30 horas, anunciou que ofrece máis de 10.000 artigos no novo establecemento. No caso das seccións de produto fresco son abastecidas maioritariamente por preto "dun milleiro de provedores locais", asegurou. Dispón tamén de artigos da marca propia Ifa e produtos bio, orgánicos, veganos e sen lactosa, entre outros, co fin de así "dar resposta ás novas tendencias de consumo", indicou.
O negocio ofrece tamén servizo a domicilio, así como acceso gratuíto á rede wifi.
Con motivo da reapertura, entre o xoves e o próximo 2 de decembro, por cada 10 euros de compra, os clientes poden participar no sorteo dun teléfono iPhone 12 e unha Smart TV, anunciou a compañía, a cal conta con outro supermercado na Rúa Calvo Sotelo de Sarria.
