O arqueólogo Arturo de Lombera, codirector das escavacións no xacemento paleolítico de Cova Eirós (Triacastela), avanzou que durante a campaña arqueolóxica deste verán, finalizada o mércores, rexistráronse "avances importantes" para coñecer mellor a vida dos neandertais do noroeste peninsular.
Segundo precisou De Lombera "esta campaña foi moi satisfactoria, dado que recuperamos unha gran cantidade de materiais, próxima aos 2.000 rexistros".
ACHADOS. En concreto, trátase de materiais "relacionados con ocupacións de escasa entidade e pouco impacto", que reflectirían "estadías curtas dun grupo de neandertais na cavidade".
A maioría destes achados corresponderíanse con fauna cazada polos ocupantes da cova: "Vértebras, mandíbulas e dentes dun gran herbívoro, en concreto un cérvido; tamén dun gran bóvido que cazaron e consumiron alí, así como hastas, dentes e ósos de rebecos e outros animais da contorna", indicou De Lombera.
"Conservan as marcas de corte e machucado para acceder ao tuétano", sinalou.
CAMPAÑA. No relativo aos obxectivos da investigación, De Lombera indicou que "o principal é comprender como vivían os neandertais da época: as súas estratexias de caza, os seus modos de vida, as súas tecnoloxías; en definitiva, como se movían no territorio".
Un dos puntos fundamentais nos que incidiu a campaña deste ano é poder coñecer se nestes asentamentos de Cova Eirós desenvolvíase unha caza "especializada, baseada nun só tipo de herbívoro", ou "oportunista, cazando calquera animal que habitase na zona".
De Lombera indicou que os achados dos últimos meses parecen apuntar á segunda teoría, e que, de feito, hai unha tese "en marcha" elaborada pola investigadora Irene Valverde da Universidade de Santiago de Compostela (USC) na que se sostén tamén esta premisa.
"Noutros lugares do Cantábrico só cazan cervo, por exemplo; aquí hai moito cervo pero non dun modo exclusivo: hai tamén cabalos, rebecos ou corzos; en definitiva, animais que están na contorna da cova", apuntou De Lombera.
CONTINUIDADE DOS TRABALLOS. As investigacións en Cova Eirós son froito dun convenio entre a Universidade de Santiago de Compostela e a Consellería de Cultura da Xunta de Galicia que se renova ano a ano desde 2009.
"Esperamos que se renove outra vez o ano que vén, por que nos esperan máis novidades a medio prazo que nos permitirán comparar mellor os modos de vida do neandertal cos modos de vida do sapiens", avanzou De Lombera.
"Terminamos a escavación do nivel 3, que se corresponde cos últimos asentamentos de neandertais en Cova Eirós, e agora queda por explorar o nivel 4", engadiu.
Con respecto a este nivel 4, o arqueólogo precisou que "é moi, moi rico en materiais, de feito é o que maior densidade de materiais por metro cadrado ten de todos os niveis escavados en Cova Eirós, polo que achegará moita información e quedarán aínda moitos anos por traballar".
De Lombera tamén indicou que se intentará iniciar investigacións noutras cavidades similares da zona" –Os Ancares e O Courel–, que "poderían reunir condicións de habitabilidade óptimas para ocupacións máis intensas", "tipo campamento" no seu interior.
Estas pescudas, segundo sinalou o codirector das escavacións, "axudarían a comprender a prehistoria máis antiga de Galicia, que ten aínda moitos baleiros por encher".
ATAQUES AO PATRIMONIO. Así mesmo, De Lombera aproveitou para denunciar os numerosos atentados contra o patrimonio que se deron ultimamente en diferentes monumentos prehistóricos da provincia de Lugo, moitos deles catalogados pola Xunta de Galicia.
"Temos que conservar os xacementos tal e como están para os nosos descendentes; é un ben de todos que debemos conservar e respectar", indicou o arqueólogo.
"A intervención humana pode alterar os perfís e causar a perda de moita información, que é a que nos axuda a comprender o modo de vida dos nosos antepasados", precisou.
