A organización do festival Esmorga Fest de Sarria, que corre a cargo da asociación cultural Esmorgart, afirmou que o evento deixou na vila un beneficio de preto "de 200.000 euros".
Os promotores fixeron este mércores un balance da quinta edición do festival, celebrado os días 15 e 16 de marzo e no que participaron un total de "1.800 persoas". Estas deixaron en Sarria "177.000 euros", segundo os seus cálculos. A esta contía hai que sumar "19.550 euros" de gastos da organización. Por iso, consideran que foi "un éxito rotundo" para a vila.
O evento esgotou as entradas e a metade das que se venderon a través de internet foron fóra de Galicia. Ademais, houbo "xente de Sarria e de fóra que se quedou sen elas". "Foi a edición que consagrou o festival", aseguraron.
O Esmorga Fest tivo este ano un orzamento de 65.000 euros e contou cunha vintena de grupos, como Carolina Durante e Triángulo de Amor Bizarro.
A asociación comezará xa a traballar na próxima edición, aínda que esperarán á celebración das eleccións municipais para saber se continúan tendo o apoio do Concello. Segundo sinalaron, o Concello ofrece unha importante axuda para o festival e sen ela non se podería organizar. Contaron tamén coa colaboración de Son Estrella Galicia, Gadis e Jägermeister.
Esmorgart lamenta que a Deputación Provincial de Lugo outorgue axudas "irrisorias" ao festival. "Non só é cultura, tamén é turismo e é un éxito para o pobo", opinaron desde o colectivo. Por iso, esperan que esta administración e a Xunta de Galicia colaboren en próximas edicións.