Un peregrino que percorría o Camiño de Santiago en bibicleta resultou ferido grave este xoves en Samos tras saírse da vía e caer.
O accidente produciuse sobre as 16.30 horas no quilómetro 36,800 da estrada que comunica Pedrafita do Cebreiro e Palas de Rei (LU-633), na entrada da localidade de Samos.
O home, quen facía a ruta xacobea con outras tres persoas, foi evacuado en helicóptero ao Complexo Hospitalario Universitario da Coruña (Chuac). Presenta unha fractura de mandíbula e outros traumatismos.
Ata o lugar do accidente trasladáronse unha ambulancia do 061, axentes do subsector de Tráfico da Garda Civil, os bombeiros do parque comarcal de Sarria e a Garda Civil de Samos.
