A sorte acompañou a unha veciña do Incio que o pasado mércores se librou polos pelos de sufrir feridas de maior consideración. "Sentín un golpe coma un trono", asegura a muller, de 81 anos, que estaba a pechar ás galiñas cando o alpendre no que dormen as aves veu abaixo. Puido saír a tempo por un pequeno oco e resultou con mazaduras nunha perna, polas que recibiu asistencia médica.
O suceso ocorreu pouco antes das nove e media da noite do mércores, no núcleo de Noceda. Como cada día, Elvira Carnero dispúñase a pecharlle ás galiñas e xusto nese momento comezou o derrubamento do alpendre, situado nas proximidades da súa casa.
"Sentín un golpe coma un trono e xa vin que empezaba a caer terra. Virxe santísima, que se está desfacendo! Tratei de saír para fóra por un cachiño que me quedou aberto. Escapei e tropecei. Cando me vin fóra dixen: Que sorte tiven!", relata a muller.
Non foi a única que levou un gran susto. A súa irmá, coa que reside xunto a un terceiro irmán, tamén viviu momentos de angustia. "Oín un ruído e pensei que chocaran dous camións na estrada. Era xusto o momento no que miña irmá ía xunto ás pitas. Ó saber que houbera alí un derrubamento, empecei a chamar por ela e non contestaba. Estiven nas últimas", conta Mercedes.
A irmá da ferida levou un gran susto porque sabía que estaba a pechar as galiñas cando o tellado veu abaixo
PISTA POLIDEPORTIVA. O tellado do alpendre, que non é propiedade desta familia, colapsou e, non só caeron madeiras, senón tamén ladrillos e bloques. Os materiais desprendidos precipitáronse sobre unha era e sobre un camiño que quedou inutilizado e que, segundo os veciños, resulta moi frecuentado porque conduce a unha pista polideportiva e á zona onde se instala unha unidade móbil da inspección técnica de vehículos agrícolas.
Por iso, felicítanse polo feito de que o incidente se saldase sen consecuencias maiores. "Os nenos que veñen do colexio pasan por aí para ir ó polideportivo", sinalan os residentes, quen din que hai tempo alertaron sobre o estado do inmoble, o cal foi revisado sen detectar riscos.
O servizo de urxencias 112 Galicia mobilizou varios efectivos na noite do mércores. Ata Noceda foi
Tamén se desprazaron os bombeiros do parque comarcal, que sanearon a construción para previr novos derrubamentos, nunha intervención que durou ao redor dunha hora.
De igual modo, mobilizouse a Garda Civil, que acordoou o camiño e a zona do incidente, Protección Civil do Incio e persoal do Concello. Segundo explicou a alcaldesa, Laura Celeiro, o Concello tamén precintou a zona e colocou un sinal de prohibido o paso polo camiño afectado, tras o cal encargou un informe ao técnico municipal en base ao cal adoptar as medidas oportunas.
Ao parecer o problema é que a construción usada como galiñeiro non ten uns donos facilmente localizables que se fagan cargo dela por diversas circunstancias da familia propietaria.
A rexedora sinalou tamén que o corte do camiño non deixa sen comunicación a pista polideportiva dado que existe outro acceso desde a estrada LU-546.
