Un total de 16 expositores confirmaron a súa participación na cuarta edición da feira Fiporco, dedicada ao porco e os seus produtos gastronómicos, que se celebrará o
O evento, que busca exaltar e dar a coñecer a longa tradición da comarca na fabricación de embutidos, contará coa presenza na súa maioría de produtores procedentes da zona. Así, desde as once da mañá e ata as oito da tarde, haberá venda de produtos derivados do porco, aos que se sumarán outros como mel, queixos, pemento ou doces de elaboración artesanal.
A celebración desta feira coincidirá coa duodécima edición do Cocido do Porco Celta, que tamén organiza o Concello xunto a un grupo de hostaleiros, coa colaboración doutros concellos da comarca, a Xunta e a Deputación de Lugo. Será ás 14.30 horas, tamén no mercado gandeiro, onde se habilitarán ao redor de medio centenar de mesas, cada unha delas para 13 comensais.
As reservas para esta degustación pódense realizar nos hoteis sarriáns Alfonso IX e Roma, así como na Veiga de Samos, establecementos que tamén servirán esa mesma xornada o cocido de porco celta e, ao día seguinte, ovos fritidos con chourizos.
Os actos do día 8 terán como pregoeiro ao presidente do Tribunal Constitucional, Juan José González Rivas, quen xa visitou Sarria en ocasións precedentes con motivo da celebración das recoñecidas Xornadas Xurídicas Román García Varela.
Estes eventos dedicados á promoción dos produtos do porco completaranse con animación musical no recinto e outras actividades paralelas que a organización está a pechar.
