O empresario sarrián Ernesto López Acevedo López faleceu esta semana aos 91 anos en Madrid, cidade na que residía. Nacido en 1930, foi enxeñeiro de Camiños, Canles e Portos e traballou na construtora Entrecanales para, tempo despois, facerse coa firma Corviam, encargada de executar as obras do Plan de Accesos a Galicia por Valdeorras, Quiroga, Sarria e Lugo. Ese feito foi o que fixo asentar durante anos á empresa, unha das maiores do sector en España, no municipio sarrián.
Ernesto López-Acevedo era membro dunha histórica saga familiar na vila, cuxa casa natal aínda segue en pé na Rúa Murallón. O seu avó, Juan, chegou a finais do século XIX e en Sarria pronto destacou como un distinguido notario, así como o seu pai, Ernesto López Martínez, que foi secretario do Concello durante a República. Do seu matrimonio con Estrela López tivo catro fillos que volveron adoptar o apelido composto López-Acevedo: Javier, alcalde de Sarria entre 1961 e 1964 e a quen se lle debe a área do Chanto, tal e como recordan os veciños; Tinita, farmacéutica en Paradela e logo na vila, nun local da Rúa Diego Pazos; Araceli, que vive en México e acudiu de visita a Sarria fai uns tres anos; e Ernesto, a quen os seus familiares e aqueles que o coñecían e apreciaban choran a súa morte.
Aínda que non era moi habitual velo na localidade sarriá, din os seus familiares que sempre tiña palabras de agarimo para a súa terra natal, onde aínda residen varios sobriños e bisobrinos.
